Akademia et al. bied aan: Kuns van verkope – SPIN-vrae
Akademia et al. se gewilde kortkursus, Kuns van verkope: SPIN-vrae, word weer in 2025 aangebied en kursusgangers het ‘n keuse tussen twee formate. Gedurende Meimaand word die kursus aanlyn aangebied terwyl dit ook in persoon gedurende Augustus aangebied sal word. Hierdie kortkursus handel oor ʼn raamwerk (SPIN) om effektiewe vrae te vra tydens die verkopegesprek tussen die verkoper en koper om sodoende seker te maak dat die transaksie plaasvind of doelwitte bereik word. Die kursus sal in Afrikaans en sal ‘n werkswinkelformaat aanneem.
Die kursus is ideaal vir enige verkoopspersoon, asook persone wat idees, produkte of dienste aan ʼn bepaalde mark moet verkoop. Enige iemand met ʼn Nasionale Senior Sertifikaat (NSS) en ʼn passie vir verkope kan egter vir die kursus te registreer.
Die aanlyn sessies asook die werkswinkel vir hierdie kursus sal die volgende inhoud dek:
- Die begronding van verkope en die SPIN-raamwerk;
- Ontleding van teikengehoor;
- SPIN-vrae en die waarde daarvan; en
- SPIN-vrae in eie konteks.
Volgens Salomien Boshoff, kursusleier- en aanbieder van die Kuns van verkope-kursus, gaan kursusgangers prakties leer hoe om een van die betroubaarste navorsinggesteunde raamwerke te gebruik, naamlik SPIN®. “Dit verwys na vrae wat tydens ʼn verkoopgesprek gevra moet word, naamlik vrae oor die koper se situasie, moontlike probleme wat die koper mag ervaar, vrae oor die implikasie van daardie probleem in die koper se lewe en wat die koper nodig het om huidige behoeftes te bevredig,” vertel Boshoff. Sy vertel voorts dat SPIN-vrae deur meer as 90% van die Fortune 500-maatskappye gebruik word om hul verkoopspersoneel op te lei.
Boshoff is ʼn dosent vir verskeie modules in Bestuurswetenskappe by Akademia en die Sakeskool van die Universiteit van die Vrystaat. Sy beskik oor ʼn meestersgraad in Ondernemingsbestuur met spesialisasie in Bemarking. Haar passie vir onderrig en leer rig haar navorsing om verskillende wyses waarop studente se leer bevorder kan word, te verstaan.
Die koste van hierdie kursus in welke formaat beloop R2 200 . Registrasies vir die aanlyn kursus sluit op 21 Mei en vir die in persoon werkswinkel op 21 Augustus. Besoek gerus Akademia et al. se webblad vir meer inligting oor hierdie kortkursus.
