Oefen jou taalspiere met ʼn splinternuwe kortkursus: Zoeloe vir beginners
Wil jy graag Zoeloe (isiZulu) beter verstaan én praat ten einde jou gespreksvaardighede te verbeter? Indien wel, bied Akademia et al. ʼn splinternuwe kortkursus aan wat pasgemaak is vir jou. Vanaf 27 Februarie 2025 kan jy jou taalspiere oefen en hierdie grootste moedertaal in Suid-Afrika by wyse van ʼn agt week lange aanlyn kortkursus, Zoeloe vir beginners, aanpak.
Volgens Karien Brits, kursusleier, heers daar gróót opgewondenheid oor dié kortkursus asook die feit dat Frikkie Mulder – wat self méér as tien tale kan praat – as kursusaanbieder optree. Sy unieke aanbiedingstyl kombineer die taalprogram met verhale, geskiedenis, en filosofiese tendense uit die huidige Zoeloesprekende wêreld asook vanuit sy eie belewenis en analise daarvan.
Maar hoekom is dit belangrik én nuttig om ʼn nuwe taal aan te leer? Brits verduidelik dat die mens nog altyd die behoefte gehad het om te kommunikeer. Die realiteit in ʼn meertalige land soos Suid-Afrika is volgens Brits egter dat ons dikwels deur middel van ʼn taal kommunikeer wat die gespreksgenote se tweede of selfs derde taal is. “Met hierdie kortkursus word daar aan belangstellendes die geleentheid gebied om, by wyse van taal, ʼn denke- én hartsverbintenis met iemand te maak,” verduidelik Brits. Sy voeg by dat ná afloop van die voltooiing van dié kursus daar ʼn fassinerende nuwe leefwêreld vir deelnemers sal oopgaan.
Die volgende kursusinhoud sal gedek word:
- Daar word een lied per les, soos byvoorbeeld “Impi” deur die groep Juluka bespreek.
- Dialoog waarin die kursusganger begelei word om in gesprek te tree met ʼn Zoeloesprekende.
- Een aspek van Zoeloe se taalleer word per les bespreek.
- Spesifieke idiome en gesegdes in Zoeloe word bekendgestel.
In terme van die tydsduur van die kursus, sal die aanlyn sessies vanaf Donderdag 27 Februarie tot en met Donderdag 24 April aangebied word. Hierdie sessies sien as volg daaruit:
- Leereenheid 1: Naamwoordklasstelsel
- Leereenheid 2: Naamwoord en werkwoord
- Leereenheid 3: Voornaamwoorde
- Leereenheid 4: Werkwoorde (tye)
- Leereenheid 5: Werkwoorde (agtervoegsels)
- Leereenheid 6: Die imperatief
- Leereenheid 7: Voorsetsels
- Leereenheid 8: Ideofone
Die koste verbonde aan hierdie kortkursus beloop R3 300 en registrasie sluit op 20 Februarie. Besigtig gerus die Akademia et al.-webblad vir meer inligting.
