Kursusaanbieder

Deon Meiring het op laerskool sy eerste liedjies begin skryf. Hy het gedink dit gaan help met sy sukkelende romantiese loopbaan. Dit het nie, maar hy het nogtans aanhou skryf. Vandag is hy getroud en sy liedjies speel dwarsoor Suid-Afrika deur middel van sy gevestigde soloprojek en groepe, Glaskas en Dans Dans Lisa. Dié begaafde musikant se musiek is al in films en op TV gebruik. Hy het ook al talle opkomende liedjieskrywers begelei om hulle vaardighede te verfyn. Hy skryf en bring ook steeds gereeld nuwe musiek uit.

Mede-aanbieder tydens die praktiese sessie

Lucinda Bosch is ’n sangeres, liedjieskrywer, kunstenaar en kunsdirekteur van Linden, Johannesburg. Sedert haar tienerjare is sy die stem agter Die Melktert Kommissie, wat in 2002 die JIP Rockspaaider-kompetisie gewen het en daarna verskeie albums en musiekvideo’s vrygestel het. Haar sololoopbaan het in 2019 momentum gekry met die kortspeelplaat Waar Die See Die Kus Omhels saam met Bouwer Bosch, gevolg deur haar eerste enkelsnit “Weerloos” in 2020 en haar album Uitskryf in 2021.